All in two bleyja með innleggi

All in two bleyja sem passar frá u.þ.b. 2,5 til 14 kg. Skelina má nota aftur allt að fjórum sinnum milli þvotta (wipeable cover). Með bleyjunni fylgir eitt innlegg. Bæði innlegg og skel eru með einfaldar teygjur við læri sem býr til tvöfalda vörn gegn leka. Skelin hefur breiða teygju við bakið og innleggið hefur einfalda. 

Nánari lýsing:

Dásamlega falleg og vönduð AI2 bleyja frá Cloth Club í Ástralíu. Eigandi Cloth Club hannar mynstrin sjálf og eru þau sérlega fögur og stílhrein, með vintage yfirbragð. 

Bleyjan samanstendur af tveimur hlutum, annars vegar vatnsheldri skel og hins vegar rakadrægu innleggi sem smellt er í bleyjuna. Með bleyjunni fylgir eitt innlegg og hægt er að bæta við fleiri innleggjum. Nota má skelina aftur allt að fjórum sinnum áður en hún er þvegin, að því gefnu að kúkur hafi ekki farið í hana. Þannig getur þvotturinn minnkað svo um munar! 

Þessi bleyja hefur ákveðna kosti fram yfir margar aðrar AI2 bleyjur, til dæmis að hún er með þunnu en breiðu innleggi sem hefur sömu lögun og bleyjan og því er mikið yfirborð sem tekur við vætu. Þá er innleggið einnig mjög mjúkt óháð því hvernig það er þurrkað. Loks hentar bleyjan vel frá fæðingu þar sem hún er í smærri kantinum og getur passað börnum allt niður í 2,5 kg. 

Stærðir

Cloth Club bleyjan er í OSFM stærð og hentar börnum um það bil 2,5-14 kg. Hún er í smærri kantinum miðað við aðrar OSFM og OS bleyjur sem þýðir að bleyjan hentar nýburum mun betur en flestar aðrar OSFM og OS bleyjur. Þegar teygjan kringum læraopin er slök og bleyjan stillt í mismunandi hæðarstillingar, fara læraopin á bleyjunni fara alveg niður í 9,5 cm og upp í 22 cm í ummál. 

Bleyjan er vel aðsniðin og nett, er þunn og ekki mikil um sig - þó án þess að fórna rakadrægninni sem er mjög góð. 

Notkun

☑ Rakadrægt innra lag

☑ Vatnsfráhrindandi ytra lag

Þessi vara er svokölluð AI2 bleyja og það merkir að bleyjan er samsett úr tveimur hlutum sem er þó smellt saman og mynda eina heild. Innan á skelinni eru fjórar smellur sem innlegginu er smellt í. Innleggið sjálft er hægt að nota á fjölbreyttan hátt. Innleggið hefur sex smellur og það er vegna þess að öðrum megin er hægt að lengdarstilla innleggið til að passa betur í minni stillingu á skelinni. Einnig er hægt að nota innleggið sem hálfgerða fitted bleyju fyrir nýbura.

Sjá myndbönd hér af Instagram-síðu Cloth Club sem sýnir hvernig nota má bleyjuna fyrir ólíkar stærðir barna: 
Fyrir breiðari læri, smellið hér. 
Fyrir nýbura, smellið hér og hér. 
Fyrir hvernig við látum innleggið passa í skelina, sama hvaða hæðarstilling (rise setting) er á skelinni, smellið hér. 
Fyrir notkun með ýmiss konar öðrum innleggum, flat bleyjum o.fl., smellið hér. 

Skelin er með breiða teygju við bak og einfalda teygju við læri. Innleggið er síðan líka með teygju við bak og læri sem býr til tvöfalda teygju við læri. Hér er því á ferðinni bleyja með öfluga vörn gegn leka. 

Þessi bleyja er bæði ytra lagið og innra lagið og hefur því að geyma bæði vatnsheldni og rakadrægni. Það er þó meira en sjálfsagt að blanda saman kerfum eins og með önnur merki. Hægt er að nota Cloth Club skelina yfir til dæmis flat og preflat bleyjur og einnig hægt að nota Cloth Club innleggin undir aðrar skeljar eða jafnvel undir flat bleyju sem eykur rakadrægnina mjög og úr yrði góð næturbleyja með stay-dry lagi. 

Þvottur

Skeljarnar má nota allt að fjórum sinnum á milli þvotta, að því gefnu að kúkur fari ekki á þær (á ensku kallast það wipeable cover). 

Skeljar og innlegg má þvo á 40-60°. Innleggin má þurrka á lágum hita í þurrkara en skeljarnar skal hengja upp til þerris. Til að lengja líftíma skelja úr gerviefnum er mælt með að forðast að láta þær vera í miklu sólarljósi, til dæmis á snúru úti á sumrin. Innleggin hins vegar er tilvalið að þurrka í sólinni á sumrin og einnig er sólin okkar besti blettaeyðir. 

Engar reglur varðandi hvort innleggjunum sé smellt úr skeljunum áður en þvegið er, það er smekksatriði. Mismunandi er hvort fólk kjósi að hafa innleggið smellt í báðum eða öðru megin, eða að losa það alveg úr fyrir þvott. 

Efni

Skelin er úr tvöföldu thermoplastic polyurethane (TPU) efni sem tryggir góða vatnsheldni. 

Innleggin eru úr einstaklega rakadrægu terry efni sem gert er úr 47% hampi og 38% lífrænni bómull, ásamt 15% pólýester sem er grunnurinn/netið sem efnið er ofið í. Ofan á innlegginu er síðan lag af athletic wicking jersey (AWJ) efni sem er gert úr pólýester. AWJ er þunnt efni sem dregur engan raka í sig og hleypir þannig allri vætu í gegnum sig. Þetta þýðir að barnið finnur mun síður fyrir vætu sem getur verið mikilvægt fyrir sum börn sem eru með viðkvæma húð. 

Efnin eru vottuð af Global Organic Textile Standard (GOTS) og Oeko-Tex. 

Framleiðsla

Cloth Club vörurnar eru framleiddar á ábyrgan hátt í Kína.